Saksóknarar í Mexíkó hafa sakað bæjarstjóra sveitarfélagsins Tenancingo, Nancy Napoles, um að hafa sviðsett eigið mannrán í þeim tilgangi að réttlæta fjárdrátt upp á 2,3 milljóna bandaríkjadala, sem er jafnvirði 40 milljóna pesóa.
Napoles, sem tilheyrir stjórnarflokknum Morena undir forystu forsetans Claudia Sheinbaum, vísar ásökununum alfarið á bug og segir þær pólitískt drifnar.
Samkvæmt lögreglu var Napoles að sögn numin á brott af vopnuðum mönnum þegar hún var stöðvuð á ferð í bíl sínum. Málið byggir meðal annars á framburði þriggja einstaklinga sem hafa verið handteknir vegna meints aðildar að mannráninu.
Saksóknarar segja að á meðan á meintu haldi hennar stóð hafi „ræningjarnir“ krafist 40 milljóna pesóa lausnargjalds og hótað að bana bæði henni og fjölskyldu hennar yrði greiðslan ekki innt af hendi. Þá hafi henni verið ráðlagt að afla fjárins úr sjóðum sveitarfélagsins ef fjölskyldan gæti ekki greitt lausnargjaldið.
Rannsóknin tók hins vegar nýja stefnu þegar vitni sá þegar Napoles var færð nauðug inn í bifreið og tilkynnti lögreglu um atvikið. Við það hófst umfangsmikil leit sem að sögn yfirvalda raskaði áætluninni og varð til þess að henni var hætt.
Við frekari rannsókn komu fram misræmi í frásögn bæjarstjórans. Yfirvöld telja nú að eiginmaður hennar og mágur hafi skipulagt hið meinta falska mannrán til að skapa skýringu á opinberu fé sem þegar hafði verið dregið út úr sveitarfélaginu með ólögmætum hætti.
Eiginmaður Napoles og mágur hennar eru eftirlýstir og hafa ekki verið handteknir. Engin handtökuskipun hefur hins vegar verið gefin út á hendur bæjarstjóranum sjálfum, en hún hefur verið kölluð til skýrslutöku 9. júlí vegna rannsóknarinnar.
Napoles segist reiðubúin að vinna með yfirvöldum að því að upplýsa málið og tryggja að þeir sem raunverulega beri ábyrgð verði látnir sæta ábyrgð.
