Bandaríska leikkonan Daveigh Chase, sem varð heimsþekkt fyrir að ljá aðalpersónunni Lilo rödd sína í Disney-teiknimyndinni Lilo & Stitch, er látin, 35 ára að aldri. Frá þessu greina bandarískir fjölmiðlar.
Samkvæmt upplýsingum frá föður hennar, John David Schwallier, lést Chase á sjúkrahúsi í Los Angeles á þriðjudag vegna fylgikvilla af völdum heilahimnubólgu og blóðsýkingar. Hann sagði í samtali við The New York Times að dóttir hans hefði glímt við fíknivanda frá unglingsárum og verið heimilislaus um skeið í Los Angeles á síðustu árum.
Chase var aðeins 11 ára gömul þegar Lilo & Stitch kom út árið 2002 og sló í gegn um allan heim. Hún hélt áfram að túlka persónuna Lilo í sjónvarpsþáttum og tölvuleikjum sem byggðu á vinsældum myndarinnar.
Hún naut einnig mikillar athygli fyrir að ljá Chihiro rödd sína í ensku talsetningu japönsku teiknimyndarinnar Spirited Away frá Studio Ghibli, en myndin hlaut Óskarsverðlaun sem besta teiknimynd ársins.
Á ferli sínum sem barnaleikkona kom Chase fram í fjölmörgum verkefnum. Hún lék meðal annars yngri systur persónu Jake Gyllenhaal í kvikmyndinni Donnie Darko og vakti sérstaka athygli fyrir hlutverk sitt sem Samara Morgan í hryllingsmyndinni The Ring árið 2002. Fyrir túlkun sína á þeirri persónu hlaut hún MTV Movie-verðlaunin fyrir besta illmennið árið 2003.
Samkvæmt fréttamiðlinum TMZ hafði kærasti hennar, Roy Hernandez, áður stofnað fjáröflunarsíðu til að standa straum af heilbrigðiskostnaði hennar. Þar lýsti hann erfiðleikum sem Chase hefði glímt við í kjölfar erfiðrar æsku og sambandsrofs við fjölskyldu sína.
