Sveinn Andri lögmaður segist „þakklátur fyrir hvern þann dag sem Ríkisútvarpið stendur vörð um heiðarlega og hlutlausa blaðamennsku.“ Í færslu á Facebook lýsir Sveinn því þegar hann var ungur og starfaði sem blaðamaður á Morgunblaðinu.

„Mér fannst fráleitt að ríkið starfrækti fjölmiðil. Í dag, þegar maður sér hvernig Morgunblaðið er purrkunarlaust notað sem áróðurstæki fyrir hagsmuni eigenda blaðsins.“

Þetta segir hann um frétt sem birtist á mbl.is um kínverska fræðimanninn Zhao Hai, forstöðumann alþjóðastjórnmálasviðs kínversku vísindaakademíunnar, en hann sagði á fundi í Háskóla Íslands „Íslendinga þurfa að gera sér grein fyrir því hvaða afleiðingar það hefur að ganga í ESB, ríkjasamband sem hafi einkenni stórríkis.“

Zhao, sem er jafnframt ráðgjafi kínverskra stjórnvalda í alþjóðamálum, ræddi alþjóðamál í háskólanum.

Sveinn Andri virðist ósattur við sinn fyrri vinnustað og segir Moggann vita vel að það sé ekkert til sem heitir sjálfstæð fræðimennska í alþjóðastjórnmálum í Kína. „Í Kína er allri fræðilegri umfjöllun vandlega miðstýrt af kínverska kommúnistaflokknum, þannig að fari saman við langtíma utanríkishagsmuni Kína. Veik Evrópa þjónar langtímahagsmunum kínverskra stjórnvalda.

Hver hefði trúað því að áróðursvél Morgunblaðsins og kínverska kommúnistaflokksins slæju í takt?

Ja hérna hér! Ekkert skrýtið að áskrifendum blaðsins fækki.“