Tveir menn hafa verið dæmdir í fangelsi fyrir að verða móður og fjögurra ára dóttur hennar að bana þegar þeir kepptu í kappakstri á öflugum sportbílum sínum á götu í miðborg Leeds í Englandi.
Justyna Hulboj, 27 ára, og dóttir hennar, Lena Czepczor, voru á leið í leikskóla stúlkunnar 16. janúar 2023 þegar hvítur Audi TT-bíll ók á þær á A61 Scott Hall Road.
Ökumaður Audi-bílsins, hinn 29 ára Hardeep Bhachu, játaði að hafa valdið dauða mæðgnanna með hættulegum akstri.
Jasskamal Riyat (27 ára), sem ók svörtum BMW 135i-bíl skammt á eftir Audi-bílnum, neitaði því að hafa tekið þátt í kappakstri. Hann var þó sakfelldur fyrir sömu brot við réttarhöld fyrr á þessu ári.
Mennirnir voru í dag dæmdir í fangelsi við Crown Court-dómstólinn í Leeds. Bhachu hlaut 12 ára fangelsisdóm en Riyat var dæmdur í 16 ára fangelsi.
