Áhorfendur hafa lýst gervigreindaraðlögun Elons Musk á Ódysseifskviðu Hómers sem „algjöru rusli“ eftir að Grok Imagine sendi frá sér fyrsta sjö mínútna þáttinn, þremur mánuðum eftir að milljarðamæringurinn lofaði kvikmynd í fullri lengd sem yrði „sögulega nákvæm og trú list Hómers“. Myndbandið var birt á samfélagsmiðlinum X og er afrakstur samstarfs Grok Imagine við Wonder Studios og leikstjórann Dev Walker, sem sérhæfa sig í kvikmyndagerð með gervigreind.

Musk tilkynnti verkefnið í júlí, skömmu eftir frumsýningu kvikmyndar Christopher Nolan um gríska söguljóðið. Hann hafði gagnrýnt leikaravalið í mynd Nolans, einkum þá ákvörðun að ráða Lupitu Nyong’o í hlutverk Helenu fögru. Musk sakaði Nolan um að „vanhelga Hómer“ til að uppfylla það sem hann kallaði „woke-reglurnar sem þarf til að vinna Óskarsverðlaun“.

„Fyrir lok þessa árs mun Grok Imagine gera kvikmynd í fullri lengd um Ódysseifskviðu sem verður sögulega nákvæm og trú list Hómers,“ skrifaði Musk á X.

Persónurnar tala ensku í stað forngrísku

Myndbandið hefst á því að Ódysseifur býr sig undir að sigla til Tróju. Penelópa afhendir honum lítinn tréhest handa ungum syni þeirra. Síðan sjást grískir hermenn undirbúa sig fyrir bardaga og berjast við Tróju, auk atriða þar sem sonur þeirra, Telemakkos, vex úr grasi og æfir bardagalistir.

Allar persónurnar eru hvítar og bera greinileg einkenni gervigreindarmynda, með fullkomnar tennur og slétta húð. Þær tala auk þess ensku í stað forngrísku, þvert á yfirlýsingar Musks um að myndin yrði trú verki Hómers.

Aðeins Ódysseifur er nafngreindur í myndbandinu, þannig að áhorfendur sem þekkja ekki söguna þurfa sjálfir að átta sig á því hverjar hinar persónurnar eru.

Viðbrögðin á X hafa verið háðsk. Einn notandi skrifaði: „Ef þetta er það sem ríkasti maður jarðar getur framleitt, þá munu gervigreindarmyndir ekki leysa alvöru kvikmyndir af hólmi í bráð.“

Annar sagði myndbandið sýna hversu lítið gervigreind skilji list og manneskjur, en sá þriðji skrifaði einfaldlega: „Algjört rusl. Eins og við var að búast. Elon Musk hefur engan smekk.“

Aðrir gagnrýndu undarlegar hreyfingar persónanna og sögðu þær líkjast gervigreindarútgáfum af persónum úr Game of Thrones.

Kvikmynd Nolans sló aðsóknarmet

Kvikmynd Christopher Nolan, Ódysseifskviða, varð gríðarlega vinsæl og halaði inn meira en 1,7 milljörðum Bandaríkjadala í miðasölu á heimsvísu. Hún varð tekjuhæsta mynd í sögu Universal Pictures og sló met fyrir stærstu opnunarhelgi kvikmyndar eftir Nolan. Hún varð einnig tekjuhæsta kvikmynd í sögu IMAX-sýninga.

Nolan hefur vísað gagnrýni á mynd sína að mestu frá sér og sagt umræður um sögulega nákvæmni hennar, áður en fólk hefði séð hana, vera óviðkomandi.

Hann hefur jafnframt líkt gervigreind við Trójuhestinn úr grísku goðsögninni.

„Ég held að gervigreind sé Trójuhestur sem allir vita að Grikkirnir eru inni í. Þetta er gegnsær hestur, búinn til úr gleri. Allir geta séð hvað er að gerast inni í honum,“ sagði Nolan í viðtali við franska blaðamanninn Hugo Travers.