Tveir einstaklingar voru handteknir eftir að ökumaður bifreiðar flúði undan lögreglu, braust inn á flugvallarsvæði í Arizona og ók þar inn á flugbraut áður en bifreiðin hafnaði á mannlausri einkaþotu.
Atvikið átti sér stað að kvöldi 17. október en lögreglan í Phoenix segir að lögreglumenn hafi þá fylgst með svartri Dodge Challenger-bifreið.
Bifreiðin vakti athygli lögreglu þar sem henni var ekið á aðeins um 60 kílómetra hraða á klukkustund þar sem leyfilegur hámarkshraði var um 105 kílómetrar. Að sögn lögreglu þurftu aðrir ökumenn ítrekað að aka fram úr henni.
Þegar lögregla reyndi að stöðva bifreiðina sinnti ökumaðurinn ekki fyrirmælum og hófst stutt eftirför. Lögregla skaut GPS-staðsetningartæki á bifreiðina og gat því fylgst með ferðum hennar bæði af jörðu niðri og úr lofti.
För bifreiðarinnar endaði við Scottsdale-flugvöll þar sem ökumaðurinn kom að læstu öryggishliði. Þegar lögreglumenn reyndu að loka bifreiðina af bakkaði ökumaðurinn á lögreglubíl og ók síðan í gegnum hliðið.
Þaðan var bifreiðinni ekið inn á flugbraut flugvallarins þar sem hún fór að sögn lögreglu hættulega nálægt nokkrum flugvélum. Ökumaðurinn ók því næst í gegnum lokaðar dyr flugskýlis áður en bifreiðin lenti á mannlausri einkaþotu og stöðvaðist.
Karl og kona hlupu frá bifreiðinni út á flugvallarsvæðið en lögreglumenn náðu þeim skömmu síðar.
Lögregla hefur borið kennsl á þau sem Liberty Dawn Still og Michael Gregory Wall. Þau voru bæði færð í fangageymslu og eiga yfir höfði sér ákærur vegna nokkurra alvarlegra brota.
Alríkislögreglan FBI rannsakar jafnframt hvernig fólkið komst inn á lokað Scottsdale-flugvallar.
