Sveinn Andri Sveinsson lögmaður gagnrýnir harðlega nýlega umfjöllun um samstarf glæpahópa hér á landi og dregur í efa trúverðugleika greininga Ríkislögreglustjóra og Europol um skipulagða glæpastarfsemi á Íslandi.

Í Facebook-færslu vísar Sveinn Andri til fréttar Morgunblaðsins frá 24. október, þar sem fjallað er um að samstarf glæpahópa hér á landi sé að sumu leyti einstakt miðað við það sem þekkist erlendis.

„Af hverju ætti einhver að trúa þessu?“ spyr Sveinn Andri og bætir við: „Greiningar Ríkislögreglustjóra og Europol um glæpastarfsemi á Íslandi hafa sýnt sig að vera álíka marktækar og ævintýri Münchhausens baróns.“

Hann rifjar jafnframt upp upphaf svokallaðs hryðjuverkamáls, þegar ríkislögreglustjóri sagði á blaðamannafundi að lögregla hefði komið í veg fyrir hryðjuverk en Sveinn Andri varði annan af tveimur sem grunaðir voru um að skipuleggja hryðjuverk. Að mati Sveins Andra reyndust þær yfirlýsingar „fullkominn þvættingur“.

Sveinn Andri segir að þar til ríkislögreglustjóri gangist við því sem hann telur rangfærslur og yfirsjónir í málinu og biðjist afsökunar á þeim muni embættið eiga erfitt með að njóta trausts.

Hann líkir stöðunni við dæmisögu Esóps um smalann sem kallaði „Úlfur, úlfur!“ svo oft að enginn trúði honum þegar hættan varð raunveruleg.