Leikarinn Eric Bauza, sem ljáði þekktum teiknimyndapersónum á borð við Kalla kanínu (Bugs Bunny) og Stegg önd (Daffy Duck) rödd sína, er látinn, aðeins 46 ára að aldri. Hann lést á heimili sínu eftir baráttu við hjarta- og æðasjúkdóm af völdum háþrýstings.
Andlát Bauza var tilkynnt af fjölskyldu hans á Instagram. Í tilkynningunni, sem birtist á svörtum bakgrunni, sagði:
„Eric Bauza, Emmy-verðlaunaður raddleikari og nútímarödd hinna goðsagnakenndu Looney Tunes-persóna Bugs Bunny og Daffy Duck, auk fjölda annarra ástsælla teiknimyndapersóna, er látinn eftir skyndilegt andlát. Nánari upplýsingar verða birtar síðar.“
Á síðustu 15 árum hafði Bauza komið að meira en 400 verkefnum hjá Warner Bros. Animation. Þar á meðal var hann rödd persóna úr Looney Tunes-teiknimyndunum, illmenna í Scooby-Doo og Luke Skywalker í Lego Star Wars.
Síðustu kvikmyndahlutverk hans verða sem persónurnar Button Wutton og Sarangay í væntanlegri DreamWorks-mynd, Forgotten Island.
Channing Dungey, stjórnarformaður Warner Bros. Television Group og bandarískra sjónvarpsstöðva fyrirtækisins, minntist Bauza í yfirlýsingu.
„Eric Bauza var einstakur raddleikari sem færði milljónum manna um allan heim gleði og hlátur. Hann fetaði í fótspor risa á borð við Mel Blanc.
Eric sagði að það væri einn mesti heiður lífs síns að fá að halda áfram hinum goðsagnakennda arfi Looney Tunes. Auk þess að búa yfir ótrúlegum hæfileikum var Eric mikils metinn meðlimur teiknimyndafjölskyldu okkar. Hugur okkar er hjá ástvinum hans.“
Ólst upp við Looney Tunes
Bauza fæddist í Toronto árið 1979 og ólst upp við að horfa á Looney Tunes. Í viðtali við NBC News árið 2021 sagði hann að bæði faðir hans og afi hefðu verið miklir aðdáendur þáttanna. Þeir horfðu á stutta búta úr þeim áður en kvikmyndir hófust í kvikmyndahúsum á Filippseyjum.
„Looney Tunes nær yfir öll tungumál og alla menningarheima,“ sagði Bauza og hélt áfram. „Sumar teiknimyndirnar eru ekki einu sinni með neinum enskumælandi hlutverkum. Sumar Looney Tunes-teiknimyndir eru látbragðsleikir. Það skiptir ekki máli hvaðan af jörðinni þú ert. Þú skilur grínið.“
Þegar Bauza tók við hlutverki Bugs Bunny í Looney Tunes Cartoons árið 2020 varð hann fyrsti leikarinn sem ekki var hvítur til að fara með hlutverkið.
Það kom honum sjálfum á óvart að fá hlutverkið. Upphaflega hafði hann aðeins verið ráðinn til að lesa inn setningar á móti LeBron James í kvikmyndinni Space Jam: A New Legacy. Rödd hans átti því ekki að heyrast í endanlegri útgáfu myndarinnar.
Bauza líkti undirbúningi sínum fyrir hlutverk Bugs Bunny við það að fara í ræktina. Hann horfði samviskusamlega á eldri þætti og kvikmyndir Looney Tunes og eyddi að minnsta kosti klukkustund á dag í að kynna sér þær.
Á þessu ári ljáði hann persónum í Rick and Morty, Coyote vs. Acme og Minions & Monsters rödd sína. Þegar hann lést var undirbúningur fyrir kvikmyndina Bye Bye Bunny: A Looney Tunes Musical á frumstigi.
Kvikmyndaframleiðandinn Christopher DeFaria, sem vann með Bauza að Coyote vs. Acme, minntist hans í samtali við Variety.
„Hann er raddleikari sem fer með hlutverk persóna sem eiga sér langa og merka sögu. Samt tókst honum að skapa sér sinn eigin sess í þessum bransa,“ sagði DeFaria.
„Á síðasta ári hafði hann ótrúleg áhrif, bæði á myndina okkar og á það að vekja athygli á þessu stórkostlega listformi.“
