Hæstiréttur hefur veitt manni leyfi til að áfrýja dómi Landsréttar þar sem íslenska ríkið var sýknað af miskabótakröfu hans vegna 14 daga sóttkvíar í nóvember 2021. Hæstiréttur telur að dómur í málinu kunni að hafa verulegt almennt gildi.

Málið varðar ákvörðun sóttvarnalæknis um að maðurinn skyldi sæta sóttkví í 14 daga eftir komu til landsins. Hann hafði ekki framvísað tilskildum vottorðum, meðal annars viðurkenndu bólusetningarvottorði, og fór ekki í PCR-sýnatöku við komuna.

Landsréttur staðfesti í júní sýknudóm héraðsdóms og taldi reglugerð um sóttvarnaráðstafanir hafa haft fullnægjandi stoð í sóttvarnalögum.

Maðurinn telur málið varða lögmætisreglu, skýrleika lagaheimilda og mörk reglugerðarvalds þegar stjórnvöld grípa til frelsisskerðandi ráðstafana.

Hæstiréttur féllst á að málið gæti haft verulegt almennt gildi og veitti því áfrýjunarleyfi.