Knattspyrnumenn rússneska félagsins Lokomotiv Moskvu voru um borð í lestarvagni sem varð fyrir árás Úkraínumanna í Voronezh-héraði í Rússlandi, að því er rússnesku fjölmiðlarnir Mash og MSK1 greindu frá. Byggðu þeir fréttir sínar á upplýsingum frá íþróttafréttamanninum Ivan Karpov.

Fréttamiðillinn Zvezda sagði jafnframt að fjölmiðlafulltrúar Lokomotiv hefðu staðfest upplýsingarnar.

Enginn leikmannanna slasaðist í árásinni og munu þeir halda til Moskvu með rútu.

Leikmenn Lokomotiv voru á heimleið frá Rostov-on-Don, þar sem þeir höfðu mætt liði Rostov í gær.

Rússneska ríkisjárnbrautafélagið greindi fyrr frá því að úkraínskir drónar hefðu ráðist á Somovo-lestarstöðina í Voronezh-héraði. Lestarvagn á leiðinni frá Anapa til Moskvu skemmdist í árásinni.

Samkvæmt fyrstu upplýsingum slösuðust fimm manns og árásin olli töfum á 18 lestum.

Tveir létust í árásum á Voronezh

Yfirvöld í Voronezh-héraði sögðu að árásir Úkraínumanna í nótt hefðu kostað tvo lífið og sært 17 til viðbótar.

Óháði Telegram-fréttamiðillinn Astra greindi ljósmyndir og myndbönd frá sjónarvottum og komst að þeirri niðurstöðu að úkraínskir drónar hefðu einnig ráðist á verksmiðju fyrirtækisins Voronezhsintezkauchuk.

Árásir Úkraínumanna höfðu sömuleiðis beinst að verksmiðjunum Tolyattikauchuk og Omsky Kauchuk dagana á undan.