Ahmed al Ahmed, sem hlaut mikla athygli í Ástralíu fyrir hetjulega framgöngu sína í mannskæðri skotárás á Bondi Beach á síðasta ári, hefur verið ákærður fyrir líkamsárás gegn föður sínum.

Samkvæmt áströlskum fjölmiðlum, þar á meðal ríkisútvarpinu ABC, var Ahmed, 44 ára gamall, ákærður eftir að hafa að sögn ráðist á föður sinn á heimili fjölskyldunnar í Bankstown í Sydney.

Lögreglan í Nýja Suður-Wales staðfesti við AFP-fréttastofuna að henni hefði borist tilkynning um meinta líkamsárás þann 15. mars síðastliðinn, en atvikið á að hafa átt sér stað sex dögum fyrr. Þá hefur maður á fertugsaldri einnig verið ákærður fyrir áreitni og ofsóknir.

Málið verður tekið fyrir fyrir dómi þann 29. júní næstkomandi. Áströlsk lögregluyfirvöld gefa almennt ekki upp nöfn einstaklinga sem sæta ákæru.

Ahmed var hylltur sem þjóðhetja eftir skotárásina á Bondi Beach í desember á síðasta ári, þegar hann náði að afvopna einn árásarmannanna. Alls létust 15 manns og tugir særðust í árásinni, sem yfirvöld hafa skilgreint sem hryðjuverk með gyðingahaturslegum hvötum.

Í kjölfar árásarinnar hitti Ahmed forsætisráðherra Ástralíu, Anthony Albanese, og var efnt til fjársöfnunar honum til stuðnings sem skilaði yfir einni milljón ástralskra dala.

Fyrr í þessum mánuði komu tveir bræður Ahmed einnig fyrir dómstóla í Sydney vegna ásakana um að þeir hefðu reynt að þrýsta á hann að afhenda hluta af því fé sem safnaðist í áðurnefndri söfnun.