Áfrýjunardómstóll í Bretlandi hefur þyngt refsingu tveggja 15 ára drengja sem voru sakfelldir fyrir nauðgun og dæmt þá til fjögurra ára vistunar í unglingafangelsi. Með því var hnekkt fyrri dómi þar sem þeim hafði verið gert að sæta samfélagsúrræðum án fangelsisvistar.
Málið vakti mikla athygli í Bretlandi eftir að dómarinn Nicholas Rowland ákvað í maí að dæma drengina til þriggja ára endurhæfingarúrræða fyrir ungmenni. Hann sagði þá meðal annars að markmiðið væri að „forðast að glæpavæða þessi börn að óþörfu“.
Sú niðurstaða sætti harðri gagnrýni og vísaði Richard Hermer, ríkislögmaður bresku ríkisstjórnarinnar, málinu til afrýjunardómstóls með þeim rökum að refsingin væri of væg.
Drengirnir voru sakfelldir fyrir að hafa nauðgað tveimur stúlkum, 14 og 15 ára, í tveimur aðskildum atvikum í Hampshire á Suður-Englandi í nóvember 2024 og janúar 2025. Myndskeið af árásunum var dreift á netinu.
Sue Carr dómari sagði við uppkvaðningu dómsins að brotin væru svo alvarleg að enginn annar kostur væri en að vista þá í fangelsisúrræði fyrir ungmenni.
„Það sem þið gerðuð var svo alvarlegt að við eigum engra annarra kosta völ,“ sagði Carr við drengina sem voru viðstaddir með fjarfundarbúnaði.
Þriðji pilturinn, sem einnig var ákærður í málinu fyrir að hafa hvatt annan drenginn til nauðgunarinnar í síðara brotinu, heldur hins vegar óbreyttri refsingu sem felur ekki í sér fangelsisvist.
Málið vakti einnig alþjóðlega athygli þegar franska nauðgunarþolandinn Gisèle Pelicot gagnrýndi upphaflega dóminn í viðtali við BBC. Hún sagðist vera „mjög slegin“ yfir því að gerendurnir hefðu fengið að ganga frjálsir á meðan fórnarlömbin myndu þurfa að lifa með afleiðingum brotanna alla ævi.
Vegna ungs aldurs verða drengirnir vistaðir í unglingafangelsi en ekki hefðbundnu fangelsi, þar sem aðeins einstaklingar 18 ára og eldri afplána refsingu.
