Yfirvöld í Brussel hafa ákveðið að banna leigurafskútur í borginni frá og með næsta ári vegna aukinna áhyggja af öryggi og truflun sem þau valda í borgarumhverfinu.
Ákvörðunin gerir Brussel að nýjustu evrópsku höfuðborginni sem grípur til aðgerða gegn rafskútum í leigu, en áður hafa borgir á borð við Paríd, Madríd og Prag innleitt sambærilegar takmarkanir.
Boris Dillies, leiðtogi svæðisstjórnar Brussel, sagði að of mörg slys, misnotkun og truflun hefðu orðið til þess að borgaryfirvöld ákváðu að hætta útgáfu leyfa fyrir þjónustuna. Núverandi rekstraraðilar, Bolt og Dott, missa rekstrarleyfi sín í lok árs 2026 og verða þau ekki endurnýjuð.
Áfram verður þó heimilt að leigja rafhjól til samgangna innan borgarinnar.
Fyrirtækin sem reka þjónustuna hafa gagnrýnt ákvörðunina harðlega, auk belgíska verkalýðsfélagsins ACV-CSC, sem segir bannið geta haft neikvæð áhrif á tugi starfa, einkum meðal láglaunafólks.
Samkvæmt upplýsingum frá svæðisstjórninni fjölgaði slysum sem tengdust rafskútum verulega á síðasta ári. Alls slösuðust 666 manns í slíkum slysum árið 2025, sem er 26 prósenta aukning frá árinu á undan.
Yfirvöld segja einnig að rafskútur hafi oft verið skilin eftir á óviðeigandi stöðum þar sem þau hindruðu umferð gangandi vegfarenda. Þá hafi þau í sumum tilfellum verið nýtt við afbrotastarfsemi, meðal annars fíkniefnasölu.
Stuðningsmenn rafskúta telja þau hins vegar umhverfisvænan samgöngukost sem geti dregið úr umferðarteppum í stórborgum.
