Chris Brown hefur verið dæmdur skaðabótaskyldur gagnvart fyrrverandi ráðskonu sinni eftir að kviðdómur komst að þeirri niðurstöðu að hann bæri ábyrgð á alvarlegum meiðslum sem hún hlaut í hundsárás á heimili hans.

Dómurinn féll á þriðjudag eftir langvarandi dómsmál milli Brown og fyrrverandi starfsmanns hans, Maria Avila. Hún höfðaði mál gegn söngvaranum og hélt því fram að hann hefði sýnt af sér gáleysi með því að leyfa stórum hundi að ganga lausum í bakgarði eignarinnar.

Samkvæmt framburði Avila varð árásin þegar hún var að fara með rusl út. Hún sagði fyrir dómi að hundurinn hefði ráðist á sig og valdið henni alvarlegum áverkum. Hún kvaðst hafa verið alblóðug eftir árásina.

Brown hafnaði sök í upphafi málsins og hélt því fram að Avila hefði sjálf ögrað hundinum og þannig átt þátt í að valda árásinni og þeim meiðslum sem hún hlaut.

Við meðferð málsins kom einnig fram að Brown hefði ekki sjálfur hringt í neyðarlínuna eftir árásina þar sem hann óttaðist að símtalið myndi leka til fjölmiðla. Í staðinn hafi annar einstaklingur úr starfsliði hans haft samband við neyðarlínuna.

Avila krafðist alls 90 milljóna bandaríkjadala, jafnvirði um 11,5 milljarða íslenskra króna, í skaðabætur vegna málsins en mun fá 13 milljónir dala.