Stjórnandi hjá kvikmyndarisanum Disney hefur verið dæmdur í tveggja og hálfs árs fangelsi í Rússlandi eftir að hafa verið fundinn með fíkniefni við komuna til landsins fyrr á þessu ári. Frá þessu greina rússneskir ríkisfjölmiðlar.
Maðurinn, sem rússneskir fjölmiðlar nefna Jugal Daterao, er sagður hafa verið stöðvaður við tollskoðun á Sheremetyevo-flugvelli í Moskvu í janúar síðastliðnum. Við leit hafi fundist gúmmíbangsar sem innihélt fíkniefni.
Samkvæmt fréttastofunni TASS var Daterao á leið til Rússlands frá Katar. Nokkrir rússneskir fjölmiðlar segja hann vera indverskan ríkisborgara. Ekki hefur komið fram hvers vegna hann ferðaðist til Rússlands.
Í dómsmálinu hélt Daterao því fram að efnið hefði verið löglega ávísað honum í Bandaríkjunum vegna heilsufarsvandamála eftir heilaaðgerð. Þrátt fyrir það var hann fundinn sekur um fíkniefnasmygl og dreifingu fíkniefna samkvæmt niðurstöðu dómstóls í Moskvu-héraði.
Dómurinn hljóðar upp á tveggja ára og sex mánaða fangelsi í refsivistarnýlendu auk sektar upp á 30 þúsund rúblur, jafnvirði um 420 bandaríkjadala.
Ekki hefur borist opinber yfirlýsing frá Disney vegna málsins.
Samkvæmt LinkedIn-síðu Daterao hefur hann starfað hjá The Walt Disney Company frá árinu 2019 sem stjórnandi afþreyingarverkefna. Á Facebook-síðu hans kemur fram að hann búi í New Jersey í Bandaríkjunum.
