Lögreglan á höfuðborgarsvæðinu lýsir enn eftir Marijus Sidavicius, 45 ára ríkisborgara Litháens, en fyrir liggur endanleg ákvörðun um að verða við beiðni litháískra yfirvalda um afhendingu hans á grundvelli evrópskrar handtökuskipunar.
Fyrst var lýst eftir Marijus þann 6. mars síðastliðinn og stendur eftirlýsingin enn yfir. Samkvæmt upplýsingum frá lögreglu er hann ekki talinn hættulegur.
Lögreglan hefur ekki viljað veita frekari upplýsingar um ástæður þess að hann er eftirlýstur. Mannlíf hafði samband lögregluna í Litháen sem sagði að best væri að hafa samband við íslensk lögregluyfirvöld um málið.
Þeir sem kunna að hafa upplýsingar um dvalarstað Marijus eða ferðir hans eru hvattir til að hafa samband við lögreglu í síma 112. Þá er einnig leitað að gráum Ford S-Max fólksbíl með skráningarnúmerinu IKR17 sem hann hefur til umráða.
Jafnframt hvetur lögreglan Marijus til að gefa sig fram.
