Farþegi um sextugt var hætt kominn þegar gluggi gaf sig í flugvél Ryanair í miðju flugi frá Grikklandi til Þýskalands. Að sögn farþega sogaðist maðurinn nærri því úr vélinni áður en samferðafólk náði að draga hann aftur inn í farþegarýmið.

Atvikið átti sér stað í morgun skömmu eftir flugtak frá Þessalóníku, að því er CNN Greece greinir frá.

Farþegar sögðust hafa heyrt mikinn hvell áður en 60 ára gamall ferðamaður frá Serbíu varð fyrir atvikinu.

Samkvæmt fréttum soguðust höfuð og axlir mannsins út um gluggann þegar hann brotnaði. Hann var þó í öryggisbelti, sem gaf öðrum farþegum nægan tíma til að grípa inn í og draga hann aftur inn í vélina.

Maðurinn var fluttur á sjúkrahús með núningsáverka.

Í yfirlýsingu frá Ryanair segir að vélin hafi snúið aftur til Þessalóníku skömmu eftir flugtak eftir að gluggi í farþegarými losnaði í fluginu.

„Vélin lenti eðlilega og farþegarnir fóru aftur inn í flugstöðina,“ sagði flugfélagið.

Myndskeið sem tekið var eftir lendingu sýnir brotna gluggann og súrefnisgrímur sem höfðu fallið niður úr loftinu.

Samkvæmt fréttum er talið að hvellurinn hafi orðið þegar hluti úr hreyfli vélarinnar losnaði, skall á glugganum og reif hann úr vélinni. Flugfélagið hefur ekki staðfest þá skýringu.

Ryanair segir að aðrir farþegar hafi síðar verið fluttir á áfangastað með annarri flugvél án frekari vandræða.