Fjögurra ára stúlka lést á laugardag eftir að henni var bjargað úr sundlaug hótels í Playa Blanca á spænsku eyjunni Lanzarote.

Neyðarlínunni á Kanaríeyjum (CECOES) barst tilkynning um atvikið um klukkan 13:30 að staðartíma, eftir að búið var að ná barninu upp úr lauginni. Stúlkan var þá meðvitundarlaus og staðfesti hjúkrunarfræðingur að stúlkan hefði farið í hjartastopp eftir að hafa innbyrt mikið af vatni.

Leiðbeiningar um endurlífgun voru veittar í gegnum síma til sundlaugarvarðar á vettvangi, sem hóf hjartahnoð þegar í stað. Sjúkraflutningamenn héldu endurlífgunartilraunum áfram við komuna á hótelið. Þrátt fyrir tilraunir viðbragðsaðila tókst ekki að lífga stúlkuna og lést hún á vettvangi.

Lögreglan vinnur að tildrögum slyssins en ekki hafa verið gefnar upp nánari upplýsingar um þjóðerni barnsins. Í yfirlýsingu frá lögreglu ítreka yfirvöld mikilvægi þess að fylgst sé stöðugt með börnum nálægt sundlaugum, sérstaklega yfir annasaman sumartímann þegar margt er um manninn á ferðamannastöðum.