Fjölskylda þriggja systra sem fundust látnar undan ströndum Brighton hefur stigið fram opinberlega og biður fólk á samfélagsmiðlum um að hætta vangaveltum og samsæriskenningum um dauða þeirra.
Systurnar Jane Adetoro, 36 ára, Christina Walters, 32 ára, og Rebecca Walters, 31 árs, fundust í sjónum við Brighton-strönd eftir að lögreglu barst tilkynning vegna áhyggna af velferð þeirra um klukkan 5:45 að morgni 13. maí.
Mikil rannsókn var sett af stað eftir að lík systranna, sem voru frá Uxbridge-hverfinu í Lundúnum, fundust í sjónum.
Frænka þeirra, Ajike Adetoro, segir fjölskylduna aldrei hafa vitað að systurnar hygðust ferðast til Brighton þennan morgun. Hún lýsir þeim sem nánum systrum sem hafi verið rólegar og ekki stundað skemmtanalíf.
„Mest truflandi fyrir okkur eru samsæriskenningarnar,“ sagði hún í samtali við The Times. „Við höfum heyrt fólk komast að þeirri niðurstöðu að þetta hafi verið rasísk árás, morð eða að þær hafi verið að djamma. Þetta eru fáránlegt. Allt þetta er rangt.“
Fjölskyldan segir systurnar hafa verið mjög nánar og gert allt saman.
„Þær voru hamingjusamar stelpur,“ sagði Ajike. „Þær fluttu úr húsi föður síns fyrir tveimur árum en sendu honum skilaboð að minnsta kosti tvisvar á dag.“
Lögreglan í Sussex gat borið kennsl á systurnar eftir að lykilkippa sem fannst hjá þeim var rakin til íbúðar þeirra í Uxbridge.
Tengja dauðann við móður þeirra
Fjölskyldan hefur velt því fyrir sér hvort systurnar hafi farið til Brighton til að minnast móður sinnar sem drukknaði í Birmingham fyrir sextán árum.
Ajike segir fjölskylduna ekki vilja geta sér til um ástæður ferðarinnar, en að dauði systranna hafi komið öllum í opna skjöldu.
Hún segir jafnframt að netumræða um málið hafi reynst fjölskyldunni sérstaklega erfið, meðal annars eftir að gervigreindarmynd af systrunum fór í dreifingu. Fjölskyldan hafi búið myndina til úr eldri ljósmyndum þar sem engin nýleg mynd hafi verið til af þeim saman.
„Við vildum bara að gervigreindin setti þær saman á fallegan hátt,“ sagði hún. „Ég hef þurft að hætta að lesa þetta.“
„Þær drukku ekki og fóru aldrei á skemmtistaði“
Ajike hvatti fólk til að hætta að dreifa kenningum á samfélagsmiðlum og muna þess í stað eftir systrunum fyrir það sem þær stóðu fyrir.
„Það er engin samúð sýnd gagnvart stelpunum þremur eða minningu þeirra,“ sagði hún. „Samfélagsmiðlar kasta skugga á allt það sem þær stóðu fyrir.“
Hún sagði systurnar hvorki hafa drukkið áfengi né reykt og að þær hefðu aldrei farið á skemmtistaði.
„Þær voru allur heimurinn fyrir föður þeirra. Nú þarf hann að skipuleggja jarðarför fyrir allar þrjár,“ sagði hún.
Faðir systranna, Joseph Adetoro, hafði áður minnst dætra sinna með hlýjum orðum.
„Engin orð geta lýst sársaukanum við að missa þrjár dætur á besta aldri,“ sagði hann. „Jane, Christina og Becky voru meira en dætur fyrir mig; þær voru gleði mín, styrkur minn og ljósið sem fyllti fjölskylduna okkar ást og hamingju.“
