Lögregla í Frakklandi hefur hafið morðrannsókn eftir að tólf ára drengur fannst látinn við árbakka í borginni Rennes í norðvesturhluta landsins í gær. Saksóknarar segja að aðkoma þriðja aðila sé meðal þeirra tilgátna sem nú séu til rannsóknar.

Drengurinn fannst við bakka Vilaine-árinnar nærri miðborg Rennes. Samkvæmt yfirlýsingu frá saksóknaraembættinu hafði blautt baðhandklæði verið hnýtt mjög þétt utan um háls hans þegar hann fannst.

Yfirvöld segja að enn liggi ekki fyrir með hvaða hætti andlátið bar að eða hvað hafi átt sér stað á vettvangi. Rannsókn stendur yfir og lögregla hefur meðal annars rannsakað svæðið í kringum íbúðabyggð nærri ánni þar sem drengurinn fannst.

Fréttamaður AFP á vettvangi greindi frá því að lögregla hefði verið við umfangsmiklar vettvangsrannsóknir á sunnudagskvöld. Íbúar í hverfinu lýstu yfir miklu áfalli vegna málsins.

„Þetta er algjört sjokk. Þetta er rólegt hverfi, ekki langt frá miðbænum. Ég hef aldrei orðið vör við neitt óvenjulegt hér,“ sagði kona á þrítugsaldri sem býr á svæðinu í samtali við AFP-fréttastofuna.

Málið hefur vakið mikla athygli í Frakklandi og bíða yfirvöld nú niðurstaðna frekari rannsókna sem varpa ljósi á tildrög andlátsins.