Alan Chambers, fyrrverandi leiðtogi samtaka sem héldu því fram að hægt væri að „lækna“ samkynhneigð, hefur verið handtekinn í Flórída grunaður um að hafa reynt að koma á kynferðislegum samskiptum við 14 ára dreng.
Samkvæmt upplýsingum frá skrifstofu sýslumanns í Orange-sýslu átti Chambers, sem er 54 ára giftur tveggja barna faðir, í kynferðislegum samskiptum á netinu við lögreglumann sem þóttist vera unglingur.
„Rannsóknarlögreglumenn okkar stöðvuðu ofbeldismann áður en hann fékk tækifæri til að skaða barn,“ sagði í tilkynningu frá skrifstofu sýslumanns.
Rannsóknin stóð yfir frá febrúar fram í maí og á Chambers að hafa sent kynferðislega gróf textaskilaboð í gegnum Snapchat og Telegram, auk þess að reyna að skipuleggja fund með drengnum.
Samkvæmt dómskjölum sendi hann meðal annars mynd af nöktum líkama manns og aðra af andliti sínu. Þá á hann ítrekað að hafa rætt um að vilja stunda kynlíf með drengnum og spurt hvort hann gæti tekið leigubíl á skrifstofu sína.
Í skilaboðunum talaði Chambers um „forboðna ást“ og sagðist vilja drenginn „mjög mikið“.
„Er það slæmt að ég vilji elska einhvern sem er 14 ára?“ á hann meðal annars að hafa skrifað lögreglumanninum að því er fram kemur í gögnum málsins.
Chambers var forseti Exodus International á árunum 2001 til 2013. Samtökin störfuðu í Orlando og héldu því fram að hægt væri að breyta kynhneigð fólks.
Árið 2013 lagði Chambers samtökin niður og bað LGBTQ-samfélagið afsökunar á „árum óréttmætrar þjáningar og fordæmingar af hálfu samtakanna og kirkjunnar“.
Rannsakendur segja einnig að þeir hafi fundið skilaboð þar sem Chambers leitaði eftir kynlífi við karlkyns vændismenn.
Hann var handtekinn í umferðareftirliti 18. maí og viðurkenndi þá að hafa átt samskipti við einstakling sem hann taldi vera 14 ára á Snapchat.
Chambers býr nú með eiginkonu sinni og tveimur börnum í Winter Park.
Hann hefur verið ákærður fyrir að lokka barn til kynferðislegra samskipta í gegnum tölvu, dreifa efni sem talið er skaðlegt börnum og ólögmæta notkun fjarskiptatækja.
Honum var sleppt gegn tryggingu upp á 15 þúsund Bandaríkjadali með því skilyrði að hann hafi ekkert samband við einstaklinga yngri en 18 ára. Þá má hann ekki nota samfélagsmiðla og aðeins fara á netið vegna vinnu.
