Mikið grjóthrun varð við Tiger Leaping Gorge, vinsælan ferðamannastað í Diqing-héraði í Yunnan í Kína, fyrr í vikunni. Myndskeið af atvikinu sýna ferðamenn hlaupa undan þegar stór björg falla niður fjallshlíðina og í ána fyrir neðan.

Enginn slasaðist í grjóthruninu samkvæmt fyrirliggjandi upplýsingum.

Á öðru myndskeiði má sjá jarðveg og grjót þjóta niður hlíðina og yfir lítið mannvirki, sem hrynur í kjölfarið og fellur í vatnið.

Ferðaþjónustufyrirtækið Shangri-La Tiger Leaping Gorge Tourism Management Company greindi frá því að grjóthrunið hefði orðið norðan megin í fjallinu um klukkan 10.30 á þriðjudagsmorgun. Grjótið féll úr um 600 metra hæð niður á svæði þar sem engir ferðamenn voru staddir.

Neyðaráætlun var virkjuð í kjölfar atviksins og starfsfólk framkvæmdi tilskildar öryggisathuganir á svæðinu. Ákvörðun var tekin um að halda gljúfrinu opnu fyrir ferðamönnum en ekki liggur fyrir hvort einhver hafi slasast.

Grjóthrun hafa orðið á svæðinu með nokkurri reglusemi að undanförnu. Sambærileg atvik voru skráð þar bæði í júlí og ágúst.