Glæsilegt og afar rúmgott einbýlishús við Háholt 3 í Garðabæ hefur verið sett á sölu.
Um er að ræða 386,2 fermetra hús á fallega gróinni og skjólsælli lóð neðan götu með stórbrotnu útsýni yfir nágrennið. Ásett verð eignarinnar er 319 milljónir króna.
Húsið var byggt árið 1984 og er teiknað af arkitektinum Kjartani Sveinssyni. Samkvæmt skráningu skiptist eignin í 167,8 fermetra neðri hæð, 174,9 fermetra efri hæð og 43,5 fermetra tvöfaldan bílskúr. Eignin telur alls fimm svefnherbergi, fjórar stofur, fjögur baðherbergi, þvottahús, gufubað og rúmgóðan bílskúr.
Fram kemur að töluvert sé af óskráðum fermetrum í húsinu og að nýtanlegt rými sé því áætlað um 420 fermetrar auk óunnins rýmis undir húsinu sem býður upp á mikla möguleika til frekari nýtingar.
Lóðin er sérstaklega vel hirt og í mikilli rækt með fjölbreyttum útisvæðum. Þar má finna sólríka timburverönd, sem nýlega hefur verið yfirfarin og borin með viðarvörn, auk hellulagðrar verandar og þökulagðs garðs í góðu skjóli.
