Frönsk lögregluyfirvöld rannsaka hvort skemmdarverk hafi valdið því að farþegalest fór út af sporinu í norðvesturhluta Frakklands í gærkvöldi. Alls slösuðust 44 í slysinu, þar af ein 18 ára kona alvarlega.
Samkvæmt heimildum AFP fannst brot úr járnbrautarteini á lestarteinunum og beinist rannsóknin því einkum að því hvort um vísvitandi verknað hafi verið að ræða.
Lestin var á leið milli borganna Rouen og Caen í Normandí þegar hún fór út af sporinu um klukkan 19:45 að staðartíma. Um borð voru 186 farþegar.
Yfirvöld virkjuðu umfangsmikla viðbragðsáætlun vegna slyssins. Um 130 slökkviliðsmenn, fimm heilbrigðisteymi og 80 neyðarbifreiðar voru send á vettvang.
Sébastien Gallois, saksóknari í Rouen, staðfesti að 44 hefðu slasast. Áfengis- og fíkniefnapróf lestarstjórans reyndust neikvæð.
Lestarumferð um svæðið hefur verið stöðvuð og rafmagn tekið af teinunum á meðan rannsókn og björgunaraðgerðir standa yfir.
