Bandarísk kona, Ashlee Jenae, sem lést nýverið við óútskýrðar aðstæður, er enn til rannsóknar hjá yfirvöldum í Tansaníu, og hafa persónulegir munir hennar, þar á meðal trúlofunarhringur, ekki verið afhentir fjölskyldu hennar.

Faðir hennar, Harry Robinson, staðfesti við TMZ að jarðneskar leifar dóttur hans hefðu verið fluttar til fjölskyldunnar í New Jersey síðastliðinn föstudag. Hins vegar hafi engir persónulegir hlutir fylgt með, og fjölskyldan sé enn í óvissu um hvort og hvenær þeir verði afhentir. Hann telur líklegt að hlutirnir séu enn í vörslu lögreglu þar sem málið sé enn opið.

Fjölskyldan hefur látið framkvæma óháða krufningu á líki Ashlee, en niðurstöður hennar liggja ekki enn fyrir. Þá er unnið að undirbúningi útfarar sem fyrirhuguð er snemma í næstu viku í New Jersey.

Samkvæmt upplýsingum yfirvalda átti Ashlee í deilum við unnusta sinn, Joe McCann, skömmu áður en hún fannst látin. Starfsfólk hótels þar sem atvikið átti sér stað hafi gripið inn í og aðskilið parið með því að færa þau í sitthvort herbergi. Þessi atburðarás er sögð vera lykilþáttur í áframhaldandi rannsókn.

Þrátt fyrir að staðbundnir miðlar hafi greint frá því að lögregla skoði möguleika á sjálfsvígi, hafnar fjölskyldan þeirri tilgátu alfarið. Hún lýsir Ashlee sem „ljósi í lífi annarra“ og segir engin merki hafa bent til þess að hún hygðist skaða sjálfa sig.