Geir Gunnar Markússon opnar sig um reynslu sína að takast á við eigin fordóma gagnvart hinsegin fólki í skoðanapistli sem birtur var á Vísi í morgun. Hann segist hafa verið mjög fordómafullur þegar hann var ungur. „Um leið var ég óöruggur í eigin skinni, hræddur og kvíðinn,“ skrifar Geir í pistli sínum.
Þegar Geir var rúmlega tvítugur kom nákominn ættingi hans úr skápnum og Geir brást illa við og sagði ættingjann hljóta að vera að grínast. „Ég hafði fram að því ekki þekkt neinn sem var opinberlega samkynhneigður. Þetta kvöld bauð þessi ættingi minn mér og vinkonu minni út að borða á veitingastaðnum Ítalíu og síðan á barinn 22 til að hitta vini sína og kærustu/a. Með þessu var ætlunin að sýna fyrir mér að þetta væri ekkert grín, en ég afneitaði þessu öllu og vissi ekki einu sinni að barinn 22 væri yfirlýstur skemmtistaður samkynhneigðra á þessum tíma,“ segir Geir.
Geir segist sjá mikið eftir framkomu sinni á þessum tíma en hann hafi þroskast mikið á liðnum áratugum. Hann hefur grátið og hlegið að fordómafullu viðbrögðum sínum með ættingjanum og gert upp fyrir hegðun sína á þeim tíma.
„Ég hvet alla sem finna fyrir fordómum gagnvart hinsegin fólki að reyna að eignast vin í hinsegin samfélaginu. Þegar þú kynnist manneskjunni á bak við skilgreininguna, breytist sjónarhornið,“ skrifar Geir í pistlinum. Hann segir að af hans reynslu sé meiri kærleikur, hlýja og vinsemd í hinsegin samfélaginu en víða annars staðar í samfélaginu.
„Það er ástæða fyrir því að fólk hatar. Fordómar spretta af óöryggi, ótta og oft vanlíðan. Enginn fæðist fordómafullur — en við lærum það af umhverfinu,“ skrifa Geir. Þess vegna er fræðsla, vinátta, opin samtöl og kærleikur svo mikilvægur því það vinnur gegn fordómunum og óttanum.
Sem foreldri segist Geir þó skilja ótta annarra foreldra um að börnin þeirra komi út úr skápnum, ekki vegna eigin fordóma heldur ótta við fordóma samfélagsins. „Þau spyrja sig: Hvernig mun barnið mitt bregðast við þegar einhver eys yfir það fúkyrðum og fordómum fyrir að vera hinsegin?“ skrifar Geir. „Sem betur fer hefur hin mikla barátta fyrir réttindum hinseginleikans í okkar samfélagi skilað okkur því að umræðan er opin og velkomin þrátt fyrir bakslag.“
Það er vissulega aukið bakslag í heiminum gagnvart réttindum hinsegin fólks. Sem dæmi voru allir hinsegin viðburðir voru bannaðir með lögum í Ungverjalandi í ár. Hér á Íslandi hafa fordómar gegn trans fólki blossað upp. Þar má nefna alvarlega líkamsárás á trans konu fyrir utan líkamsræktarstöð sem RÚV greindi frá í vor. „Við þurfum fleiri þjóðarleiðtoga og stjórnmálamenn sem klæðast dragi í gleðigöngum og fagna fjölbreytileikanum,“ skrifar Geir.
„Vonum innilega að fólk sem hatar og sýnir mikla fordóma sjái ljósið einn daginn. Því sú manneskja sem ekki getur elskað, lifir innantómu lífi,“ segir Geir Gunnar Markússon.
