Jónas Sigurjónsson, húsgagnasmiður og stofnandi Valsmíði á Akureyri, er látinn, 76 ára að aldri.

Greint er frá andláti hans á Akureyri.net.

Jónas fæddist í Ólafsfirði 30. júlí 1949. Hann ólst upp í Ólafsfirði og lauk grunnskólaprófi frá Gagnfræðaskóla Ólafsfjarðar áður en hann flutti 16 ára gamall til Akureyrar til að læra húsgagnasmíði.

Hann nam iðnina hjá húsgagnaframleiðandanum Valbjörk, lauk bæði sveins- og meistaraprófi og stofnaði fyrirtækið Valsmíði árið 1974. Rak hann fyrirtækið í hálfa öld og var þekktur fyrir fagmennsku og metnað í starfi.

Jónas kvæntist Hallfríði Lilju Einarsdóttur árið 1969. Þau eignuðust fjögur börn.

Hann naut þess að ferðast, fyrst á fjöllum með Ferðafélagi Akureyrar og síðar víða um heim með fjölskyldu og vinum. Hann var einnig virkur félagi í Oddfellowreglunni frá árinu 1987 og gegndi þar fjölmörgum trúnaðarstörfum.