Héraðsdómur Reykjaness hefur dæmt ónafngreindan karlmann í 16 mánaða fangelsi fyrir kynferðisbrot gegn átta stúlkum á aldrinum 12 til 14 ára. Fullnustu refsingarinnar var frestað og fellur hún niður að þremur árum liðnum haldi maðurinn almennu skilorði.
Maðurinn var sakfelldur fyrir að hafa árið 2022 átt óviðeigandi samskipti við stúlkurnar í gegnum samfélagsmiðilinn Snapchat. Dómurinn tekur til átta brotaþola sem voru á aldrinum 12 til 14 ára þegar brotin áttu sér stað.
Jafnframt var maðurinn sakfelldur fyrir að hafa haft í vörslum sínum mikið magn myndefnis sem sýnir kynferðislega misnotkun barna. Við rannsókn málsins lagði lögregla hald á farsíma hans þar sem efnið fannst.
Maðurinn játaði brotin skýlaust og var málið því tekið til dóms án frekari sönnunarfærslu. Í dóminum kemur fram að geðrannsókn hafi verið framkvæmd á honum. Niðurstaða matsins var sú að hann væri sakhæfur og gerði sér grein fyrir muninum á réttu og röngu.
Við ákvörðun refsingar leit dómurinn til þess að maðurinn hefði játað brotin og viðurkennt bótaskyldu gagnvart brotaþolum. Þá var einnig tekið tillit til þess að rannsókn og meðferð málsins hafði dregist verulega. Til refsiþyngingar horfði hins vegar að brotin beindust gegn ungum börnum og að umfang brotanna væri verulegt.
Dómurinn komst að þeirri niðurstöðu að hæfileg refsing væri 16 mánaða fangelsi. Vegna dráttar á rannsókn og útgáfu ákæru var þó ákveðið að skilorðsbinda refsinguna til þriggja ára.
Maðurinn var jafnframt dæmdur til að greiða brotaþolunum miskabætur sem nema samtals 3,3 milljónum króna. Þá var farsími hans gerður upptækur og honum gert að greiða rúmlega 6,5 milljónir króna í sakarkostnað.
