Vaxandi fjárfestingar í varnarmálum, ógnin frá Rússlandi og áframhaldandi stuðningur við Úkraínu voru meðal helstu umræðuefna á fundi varnarmálaráðherra Atlantshafsbandalagsins í Brussel í gær. Þorgerður Katrín Gunnarsdóttir tók þátt í fundinum fyrir hönd Íslands.

Fundurinn var sá síðasti í aðdraganda leiðtogafundar NATO sem fram fer í Ankara í Tyrklandi í byrjun júlí. Ráðherrarnir fóru yfir framvindu skuldbindinga um auknar fjárfestingar í öryggis- og varnarmálum og jafnari skiptingu byrða innan bandalagsins.

Einnig var fjallað um afleiðingar stríðsrekstrar Rússlands gegn Úkraínu, þar á meðal drónaógnir, netárásir og umsvif svonefnds skuggaflota Rússlands.

„Stór skref hafa verið tekin í að fjárfesta í fælingu og vörnum bandalagsins og í átt að jafnari byrðaskiptingu. Við erum að sjá sterkari Evrópu í sterkara Atlantshafsbandalagi þar sem samstaða er áfram okkar helsti styrkur. Þetta er ekki gert í tómarúmi heldur í beinu samhengi við ógnina sem stafar af Rússlandi og aukna óvissu í alþjóðamálum. Vægi norðurslóða fer sömuleiðis vaxandi og framlag Íslands skiptir þar verulegu máli,“ segir Þorgerður Katrín.