Bandaríski líkamsræktaráhrifavaldurinn Carly Douglas er látinn, aðeins þremur mánuðum eftir að hún greindi frá því opinberlega að hún hefði verið greind með langt gengið krabbamein. Hún var 36 ára gömul.
Fjölskylda Douglas greindi frá andláti hennar í færslu á samfélagsmiðlum þar sem henni var minnst með hlýjum orðum. Þar kom fram að hún hefði látist 13. júní síðastliðinn eftir erfiða baráttu við sjúkdóminn.
Í yfirlýsingu fjölskyldunnar segir að Douglas hafi tekist á við veikindin af miklum styrk og staðfestu, jafnframt því sem hún hafi haldið í vonina og trú sína allt til loka. Þá var sérstaklega minnst á þann stuðning og kærleika sem hún sýndi fjölskyldu sinni á meðan á veikindunum stóð.
Douglas greindi frá því í mars síðastliðnum að hún hefði verið greind með krabbamein á fjórða stigi í maga. Hún sagði frá því í tilfinningaþrungnu myndskeiði að hún hefði leitað á bráðamóttöku vegna mikilla verkja. Við rannsókn hafi komið í ljós stórt krabbameinsæxli í maga hennar og frekari rannsóknir staðfest langt genginn sjúkdóm.
Eftir greininguna deildi Douglas reglulega upplýsingum um veikindi sín og meðferð á samfélagsmiðlum, þar sem hún hafði byggt upp stóran hóp fylgjenda. Færslur hennar vöktu athygli fyrir hreinskilni og jákvætt viðhorf þrátt fyrir alvarlegar aðstæður.
Fjölskylda hennar sagði að hún hefði elskað börnin sín þrjú, River, Faye og Townes, af öllu hjarta og notið hverrar stundar með þeim og eiginmanni sínum, David Douglas.
„Við erum harmi slegin yfir missinum, en syrgjum ekki án vonar,“ sagði meðal annars í yfirlýsingu fjölskyldunnar, þar sem fram kom að minning hennar myndi lifa áfram meðal fjölskyldu, vina og fjölmargra fylgjenda hennar.
Andlát Carly Douglas hefur vakið mikla sorg meðal aðdáenda hennar og þeirra sem fylgdust með ferðalagi hennar í gegnum veikindin.
