Héraðsdómur Norðurlands vestra hefur dæmt konu á sextugsaldri í tveggja mánaða fangelsi fyrir brot í nánu sambandi og líkamsárás gegn dóttur sambýlismanns síns og annarri konu. Refsingin var skilorðsbundin til tveggja ára.
Samkvæmt dómnum áttu brotin sér stað á heimili konunnar dagana 30. júní til 2. júlí árið 2025. Konan var ákærð fyrir að hafa skapað viðvarandi ógnarástand gagnvart stjúpdóttur sambýlismanns síns með hótunum, skömmum og ofbeldi.
Í ákæru kom fram að konan hefði meðal annars kallað brotaþola ítrekað niðrandi nöfnum, þar á meðal „fucking bitch“, elt hana um heimilið og áreitt hana með ókvæðisorðum. Daginn eftir hafi hún kastað síma sem hæfði brotaþola í magann, kastað pitsakassa í hana og tekið hana hálstaki áður en hún hristi hana.
Þegar önnur kona reyndi að ganga á milli hafi ákærða ýtt eða slegið til hennar. Brotaþolarnir flúðu í kjölfarið út úr íbúðinni en ákærða elti þær, braut rúðu í forstofuhurð og kastaði stórum pitsuskera í átt að þeim þegar þær voru komnar út á bílaplan og fengu þær báðar marblett.
Að morgni 2. júlí reyndi konan jafnframt að brjóta sér leið inn í stofu íbúðarinnar þar sem brotaþolarnir höfðu læst sig inni og reyndi að veitast að annarri þeirra í gegnum rifur á hurð.
Ákærða mætti ekki fyrir dóm þegar málið var þingfest og boðaði engin forföll. Var því litið svo á að hún viðurkenndi háttsemina. Dómurinn taldi sök hennar sannaða og dæmdi hana til tveggja mánaða fangelsis, skilorðsbundið til tveggja ára. Þá var henni gert að greiða 60 þúsund krónur í sakarkostnað.
