Lögreglan sinnti fjölbreyttum verkefnum á höfuðborgarsvæðinu í dag, þar sem meðal annars var tilkynnt um skemmdarverk, líkamsárásir, húsbrot og umferðaróhapp.

Í Laugardalnum var tilkynnt um skemmdarverk á rútu þar sem rúður höfðu verið brotnar.

Þá barst lögreglu tilkynning um aðila á hlaupahjóli sem sagður er hafa áreitt fólk á útihlaupum með því að rasskella og klípa konur í rassinn. Málið er nú til skoðunar hjá lögreglu.

Í miðbænum varð umferðaróhapp, en samkvæmt upplýsingum frá lögreglu urðu engin slys á fólki. Síðar sama dag var aðili handtekinn í sama hverfi eftir að hafa ráðist á fólk. Viðbragðsaðilar, þar á meðal sjúkrabifreið, voru kallaðir á vettvang. Hinn grunaði var vistaður í fangaklefa.

Í Garðabæ var tilkynnt um húsbrot og rannsakar lögregla nú atvikið.

Í Kópavogi var tilkynnt um að einstaklingur hefði verið bitinn af hundi.

Loks var lögreglu tilkynnt um ágreining milli skyldra aðila í Reykjavík.