Ónafngreindur karlmaður hefur verið dæmdur í sjö mánaða óskilorðsbundið fangelsi í Héraðsdómi Vesturlands fyrir fjölda umferðarlagabrota og líkamsárás gegn fyrrverandi sambýliskonu sinni og barnsmóður. Jafnframt var hann sviptur ökurétti ævilangt.
Málið var umfangsmikið og byggði á fjórum ákærum sem sameinaðar voru til meðferðar fyrir dómi. Maðurinn játaði sök samkvæmt öllum ákæruliðum og var því dæmt án frekari sönnunarfærslu.
Samkvæmt dómnum var maðurinn sakfelldur fyrir að hafa ekið undir áhrifum áfengis við fjölmörg tækifæri á árunum 2025 og 2026.
Auk umferðarlagabrotanna var maðurinn fundinn sekur um líkamsárás gegn fyrrverandi sambýliskonu sinni. Samkvæmt ákæru réðst hann á konuna á heimili hennar, sló hana í höfuð og andlit, kýldi hana í búk og dró hana úr rúmi með þeim afleiðingum að hún hlaut mar, bólgur og eymsli víða um líkamann.
Við ákvörðun refsingar leit dómurinn til þess að maðurinn hafði áður hlotið viðurlög fyrir sambærileg umferðarlagabrot. Hins vegar var litið til refsilækkunar að hann játaði brotin skýlaust og hafði leitað sér aðstoðar vegna áfengisvanda síns. Dómurinn taldi engu að síður að ekki væru skilyrði til að skilorðsbinda refsinguna í ljósi ítrekaðra brota hans.
Auk fangelsisrefsingarinnar var manninum gert að greiða rúmlega 1,3 milljónir króna í sakarkostnað og málsvarnarlaun.
