Mál Jeffrey Epstein og birting skjala sem tengjast honum hefur tekið margar óvæntar beygjur á undanförnum misserum.

Í forsetabaráttunni lofaði Donald Trump að birta öll skjöl sem tengdust Jeffrey Epstein, dæmdum barnaníðingi sem lést í alríkisfangelsi fyrir tæpum sjö árum.

Síðar snerist forsetinn þó ítrekað hugur um málið.

Í nóvember undirritaði Trump engu að síður lög sem kváðu á um að dómsmálaráðuneytið skyldi birta skjölin. Í fyrstu umferð, í desember, voru aðeins um 33 þúsund skjöl gerð opinber.

Eftir harða gagnrýni voru um þrjár milljónir skjala til viðbótar birtar í janúar á þessu ári. Sú birting sætti einnig gagnrýni, meðal annars vegna þess að upphaflega hafði verið boðað að alls sex milljónir skjala yrðu birtar. Þá komu engin ný nöfn eða nýjar upplýsingar fram í skjölunum.

„Við klúðruðum þessu“

JD Vance, varaforseti Bandaríkjanna, segir stjórnvöld hafa brugðist illa við málinu.

„Við klúðruðum þessu,“ sagði hann í hlaðvarpsþættinum The Joe Rogan Experience, sem birtur var í gær.

„Fólk segir að við höfum farið illa með birtingu Epstein-skjalanna og það er rétt. Sérstaklega hvernig við miðluðum upplýsingum um málið.“

Þegar Joe Rogan spurði hvað stjórnvöld hefðu átt að gera öðruvísi svaraði Vance:

„Það hefði átt að birta öll skjölin strax í upphafi, eins fljótt og auðið var.“

Hann bætti þó við að nauðsynlegt hefði verið að afmá ákveðnar upplýsingar til að tryggja að ekki væri hægt að bera kennsl á fórnarlömb.

Segir samsæriskenningar um Trump fáránlegar

Vance, sem lýsti sjálfum sér sem „upprunalegum samsæriskenningamanni þegar kemur að Epstein-skjölunum“ og sagðist hafa skoðað málið frá öllum hliðum, sagði jafnframt að fyrrverandi dómsmálaráðherrann Pam Bondi hefði ýkt mikilvægi innihalds skjalanna áður en þau voru birt.

Að hans sögn reyndi hún einfaldlega að bregðast við pólitísku andrúmsloftinu.

Hann hafnaði jafnframt þeim kenningum að skjöl hefðu verið vísvitandi fjarlægð eða ritskoðuð til að hægt væri að kúga Donald Trump.

„Það er einfaldlega ósatt,“ sagði Vance.

Hann hafnaði einnig því að dómsmálaráðuneytið hefði dregið birtinguna á langinn til að fela upplýsingar.

Vance sagði að lokum að hann hefði sjálfur farið yfir stærstan hluta skjalanna og fullyrti að þar væri ekkert sem benti til þess að Trump hefði gerst sekur um kynferðisbrot gegn ólögráða einstaklingum.

„Ég hef séð flest skjölin og þar eru engin trúverðug gögn sem sýna að Trump hafi átt í óviðeigandi samskiptum við ólögráða einstaklinga. Aldrei. Sú hugmynd að hann sé einhvers konar barnaníðingur er fáránleg.“