Héraðsdómur Reykjaness hefur dæmt Jóhann Friðrik Unnsteinsson sekan um haturorðræðu vegna ummæla sem hann birti í athugasemd á Facebook-síðu Vísis. Málið var höfðað af embætti lögreglustjórans á Suðurnesjum eftir að samtökin Solaris lögðu fram kæru en hann lét ummælin falla 17. júní árið 2023.

„Það þarf að fara endurvekja þýsku sturturnar aftur á þetta helvítis pakk. Grikkirnir kunna að fara með þessar rottur og berja þær til hlýðni svo þær hugsa ekki einu sinni um að reyna að komast yfir landamærin þar. Þeir voru aldrei spurðir hvort þeir vildu taka á móti mússunum og skilja að rett eins og þú býður ekki rottum að sofa inná gafli hjá þér þá viltu ekki heldur fá þessi mannlegu meindýr inna á golf til þín sem eru ekki að flýja neitt nema letina í sér og slæmt efnahagskerfi & hugsa bara um að leggjast á kerfið og láta sig svo hverfa þegar kistan er tóm hvort sem það er mússarnir eða pakkið frá Venesúela,“ sagði Jóhann í ummælunum.

Samkvæmt ákæru fólust ummælin í ógnun, smánun, háði og rógburði gagnvart ótilgreindum hópi fólks á grundvelli þjóðernis, kynþáttar og trúarbragða.

Við skýrslutöku hjá lögreglu viðurkenndi Jóhann að hafa skrifað ummælin, en hélt því fram að hann hefði ekki beint þeim að neinum sérstökum hópi heldur einungis verið að tjá skoðun sína og vísa til þess sem hann hefði lesið.

Dómurinn taldi ummælin hins vegar gróflega móðgandi og alvarleg, og til þess fallin að valda skaða þeim hópum sem þau beindust að. Ekki var fallist á að þau gætu talist réttlætanlegt framlag til opinberrar umræðu.

Með hliðsjón af atvikum málsins var Jóhanni gert að greiða 100.000 króna sekt. Honum er veittur fjögurra vikna frestur til greiðslu, en að öðrum kosti tekur við átta daga fangelsisvist.