Bandaríski blaðamaðurinn og sjónvarpskonan Katie Couric segir frá óhugnanlegri upplifun sem varð til þess að hún missti tímabundið minnið. Síðar greindist hún með svokallað tímabundið algjört minnisleysi (transient global amnesia, TGA).
„Þetta var mjög óhugnanlegt og hefði getað verið miklu alvarlegra,“ skrifaði hin 69 ára gamla Couric í færslu á Substack sem hún nefndi Dagurinn sem ég mun aldrei muna.
„Að lokum er ég fegin að þetta reyndist ekki alvarlegra, þó að nokkrar klukkustundir af laugardegi í júní verði mér að eilífu glataðar.“
Atvikið átti sér stað 27. júní þegar Couric og eiginmaður hennar, John Molner, sóttu Aspen Ideas-hátíðina í Colorado. Hún hafði tekið þátt í tveimur pallborðsumræðum og segir að síðasta sem hún muni eftir sé að hafa fengið sér pylsu í hádeginu.
Að sögn eiginmannsins tóku hann og starfsnemi eftir því að eitthvað var að þegar Couric hafði lokið erindum sínum og var hún því flutt á Aspen Valley-sjúkrahúsið.
„Þegar ég var spurð hvaða mánuður væri, hvaða ár væri og hver væri forseti Bandaríkjanna svaraði ég öllu vitlaust,“ segir Couric.
„Ég var ekki viss um hvaða mánuður væri. Ég hélt að árið væri 2024 og taldi að Joe Biden væri forseti.“
Vegna einkennanna grunaði lækna fyrst að hún hefði fengið heilablóðfall og hófu rannsóknir í samræmi við það. Eiginmaður hennar segir að hún hafi jafnvel kynnt sig aftur og aftur fyrir hjúkrunarfræðingum í hvert sinn sem þeir komu inn á stofuna.
Segulómun sýndi hins vegar engin merki um heilablóðfall og eftir frekari rannsóknir greindist hún með tímabundið algjört minnisleysi.
Taugalæknirinn David Perlmutter útskýrir að um sé að ræða skyndilegt en tímabundið ástand þar sem einstaklingur missir hæfileikann til að mynda nýjar minningar.
„Viðkomandi er vakandi, með fullri meðvitund, veit hver hann er, þekkir fjölskyldu sína og getur átt eðlileg samtöl, en man ekki hvað gerðist fyrir örfáum mínútum,“ segir Perlmutter.
Orsakir ástandsins eru enn óþekktar, en það getur komið fram í kjölfar skyndilegs líkamlegs eða andlegs álags. Meðal hugsanlegra kveikja eru mikil líkamleg áreynsla, þungar lyftingar, tilfinningalegt áfall, sársauki, kynlíf, mikill hósti eða annað sem veldur áreynslu á líkamann.
