Nýlega birt myndefni úr búkmyndavél lögreglu í Las Vegas varpar ljósi á ásakanir konu á hendur klámstjörnunni Drake Von, sem hefur verið ákærður fyrir meðal annars kyrkingu og heimilisofbeldi.

Í myndskeiðinu, sem TMZ hefur birt, lýsir konan því fyrir lögreglumönnum að Von hafi legið ofan á henni og þrengt að öndun hennar þannig að hún hafi átt erfitt með að anda. Hún segist hafa reynt að ýta honum af sér en að lokum sparkað í hann til að losna undan honum. Þá hafi hann samkvæmt frásögn hennar tekið farsíma hennar í átökunum.

Konan segir að hún telji sig hafa misst meðvitund í örskamma stund.. Hún hafi ekki munað eftir um tveimur sekúndum af atburðarásinni. Að hennar sögn hafi hann í kjölfarið ýtt henni niður á jörðina, neitað að skila símanum og sagt henni að fara á hnén og biðja ef hún vildi fá hann aftur.

Samkvæmt framburði hennar tókst henni síðar að flýja vettvang og hringja í neyðarlínuna. Í myndskeiðinu sést hún einnig sýna lögreglu mar og skrámur á höndum og hnjám, en lögreglumenn mynduðu áverkana sem hluta af rannsókn málsins.

Í öðrum hluta upptökunnar ræða lögreglumenn við tvíburabróður Drake Von, Jordan Von, fyrir utan hús sem tengist rannsókninni. Þar upplýsa þeir hann um að ásakanir um kyrkingu og heimilisofbeldi hafi verið bornar fram gegn bróður hans og að húsleit fari fram á staðnum samkvæmt dómsúrskurði.

Drake Von hefur alfarið hafnað ásökununum. Í yfirlýsingu sem hann sendi TMZ eftir handtöku sína sagði hann að allar ásakanir væru rangar, málið byggðist á misskilningi og að ákærurnar yrðu felldar niður. Þá lýsti hann málinu sem tilraun til að afla athygli fjölmiðla.

Von var handtekinn og ákærður fyrir heimilisofbeldi með kyrkingu, þvingun með hótunum eða beitingu líkamlegs afls í tengslum við heimilisofbeldi og minniháttar heimilisofbeldi. Hann hefur síðan verið látinn laus gegn tryggingu á meðan málið er til rannsóknar.