Angela Webb-Milinkovich, 47 ára, frá Minnesota í Bandaríkjunum, telur sig og systur sína vera afkomendur ástarsambands Viktoríu drottningar og trúfasts þjóns hennar, John Brown. Hún segist nú ætla að láta framkvæma DNA-próf til að sanna konunglega ætt sína, og að lokamarkmið hennar sé að fá viðurkenningu frá Karli Bretakonungi.

Sagnfræðingurinn Dr. Fern Riddell hefur rannsakað málið í fjögur ár fyrir nýja bók sína Victoria’s Secret og telur að Angela eigi rætur að rekja til barns sem fæðst hafi í laumi á meðan Viktoría var ekkja. Samkvæmt kenningunni hafi Mary Ann, langamma Angelu, í raun verið tíunda barn Viktoríu drottningar og John Brown, en á pappírum sé hún skráð sem barn Hugh, bróður Johns, og konu hans Jessie.

Angela segir að þetta snúist ekki um peninga, heldur að tryggja að saga fjölskyldunnar fái þá viðurkenningu sem hún á skilið.

„Mitt helsta markmið er að sagan verði viðurkennd, að samband þeirra verði opinberlega viðurkennt og að konungsfjölskyldan hætti að neita því að það hafi átt sér stað,“ segir hún.

Í nýrri heimildarmynd Channel 4 segir Dr. Riddell að Viktoría hefði auðveldlega getað falið meðgöngu á sjöunda áratug 19. aldar, sent barnið með skipi til Nýja-Sjálands til að forðast hneyksli og síðar fengið fjölskylduna heim til Skotlands. Þekkt er að árið 1874 borgaði drottningin fyrir að þau yrðu flutt til Skotlands og síðar, eftir andlát John Brown árið 1883, flutti hún þau nær sér í Windsor.

Fjölskylda Angelu átti í fórum sínum aragrúa muna sem tengjast Brown og drottningunni, þar á meðal skartgripi og hárlokk. Í áratugi höfðu þau grunað að þau væru komin af Viktoríu, en gátu aldrei sannað það. Þegar Dr. Riddell hafði samband varð Angela undrandi.

„Ég trúði fjölskyldusögunni, en við höfðum engin sönnunargögn. Svo þegar hún sendi mér skilaboðin hugsaði ég: „Hvur fjárinn? Getur þetta verið satt“?“

Kenning Riddell styður við ástarsamband sem stóð í nærri 20 ár, og að Viktoría hafi látið fjarlægja Brown úr opinberum sögubókum eftir að sonur hennar, Játvarður VII, tók við krúnunni. Hann lét einnig eyða dagbókum móður sinnar og fjarlægja minnisvarða um John.

Angela segir að hún voni að breska konungsfjölskyldan viðurkenni á endanum söguna, þó það kunni að taka tíma.

„Ég vil að sagan fái að lifa, að fólk viti að þetta var fallegt samband og annað tækifæri til ástar fyrir Viktoríu,“ segir hún.

Hún bíður nú eftir niðurstöðum DNA-prófsins, sem gæti tekið tíma vegna þess hve langt aftur í ættina þarf að rekja. Hún leggur áherslu á að hún sækist ekki eftir auði:

„Fjármál eru það síðasta sem mér dettur í hug. Markmiðið hefur alltaf verið að gefa sögunni sannleikann sem hún á skilið.“