Þýsk kona hefur sakað fyrrverandi sambýlismann sinn um að hafa byrlað sér lyf og beitt hana kynferðisofbeldi árum saman án vitundar hennar. Málið hefur vakið mikla athygli í Þýskalandi eftir umfjöllun þýska vikuritsins Der Spiegel.

Konan, Claudia Wuttke, sem er 59 ára rithöfundur frá Hamborg, segist fyrst hafa fengið vitneskju um meint brot í júní árið 2025 þegar lögregla hafði samband við hana eftir að myndskeið fundust á fartölvu fyrrverandi sambýlismanns hennar.

Samkvæmt umfjöllun Der Spiegel fundust alls 67 myndskeið sem áttu að hafa verið tekin yfir 16 ára tímabil. Á þeim sést Wuttke að sögn beitt margvíslegu kynferðisofbeldi, meðal annars munnmökum, legganga- og endaþarmsnauðgunum, á meðan hún var meðvitundarlaus. Í einu alvarlegasta tilvikinu er maðurinn sagður hafa notað hafnaboltakylfu við ofbeldið.

Wuttke segir að hún hafi ekkert vitað um brotin fyrr en lögreglan hafði samband. Hún lýsir því að uppgötvunin hafi verið „fyrsti jarðskjálftinn“, en annað áfall hafi fylgt í kjölfarið þegar henni var tilkynnt að meirihluti málanna yrði ekki tekinn til dómsmeðferðar vegna fyrningar.

Aðeins tvö mál verða rannsökuð áfram. Annað tengist meintu broti frá árinu 2021 og hitt alvarlegu tilviki þar sem hættulegu áhaldi var beitt.

Málið hefur verið borið saman við hið umfangsmikla mál frönsku konunnar Gisele Pelicot, sem vakti heimsathygli eftir að eiginmaður hennar hafði byrlað henni lyf og látið tugi manna nauðga henni árum saman án hennar vitundar.