Líftæknifrumkvöðullinn og svokallaði „lífshakkarinn“ Bryan Johnson, sem hefur vakið heimsathygli fyrir tilraunir sínar til að hægja á öldrun, hefur greinst með ólæknandi sjálfsofnæmissjúkdóm.
Johnson ræddi greininguna í viðtali við TMZ eftir að hafa greint frá henni á samfélagsmiðlum í síðustu viku.
Þrátt fyrir kaldhæðnina í því að maður sem hefur byggt ímynd sína á því að berjast gegn öldrun skuli nú greinast með ólæknandi sjúkdóm, segist Johnson líta á tíðindin með jákvæðum augum.
Hann greindist með sjálfsofnæmisbólgu í maga (Autoimmune Gastritis) en segir fyrstu viðbrögð sín hafa verið: „Þetta er dásamlegt.“
Johnson gerði jafnframt gys að gagnrýnendum sem hafa sakað hann um að „leika Guð“ með tilraunum sínum til að hægja á öldrun.
„Þeir mega koma og segja: „Ég sagði þér það,“ í jarðarförinni minni,“ sagði hann.
Að sögn Johnsons hefur sjúkdómurinn líklega þróast hægt og bítandi í 10 til 20 ár án þess að hann vissi af því.
Vegna sjúkdómsins getur líkaminn nú ekki lengur tekið upp járn, B12-vítamín og önnur mikilvæg snefilefni. Það getur leitt til vannæringar og aukinnar hættu á krabbameini.
Þrátt fyrir það segist Johnson ekki vera svartsýnn.
Hann segir greininguna aðeins hafa aukið metnað sinn og rannsóknarteymis síns til að finna lækningu og halda áfram baráttunni gegn dauðanum.
Í viðtalinu ræðir hann einnig hvort hann telji enn raunhæft að menn geti lifað til 160 ára aldurs og hvað hann vilji að verði gert við líkama sinn eftir andlátið.
