Lík móður og tveggja barna hennar fundust á heimili í Great Denham á mánudag. Breska lögreglan hefur hafið morðrannsókn og telur að hinn grunaði í málinu hafi yfirgefið landið.

Lögregla var kölluð á vettvang eftir að áhyggjur vöknuðu vegna þess að ekkert hafði spurst til fjölskyldunnar í nokkra daga. Þegar lögreglumenn komu að húsinu við Carnoustie Drive fundu þeir þrjú lík.

Lögreglan í Bedford-skíri segir að rannsóknin sé í höndum sérhæfðrar rannsóknardeildar fyrir alvarlega glæpi á svæðinu og að aukinn lögregluviðbúnaður verði í Great Denham á meðan rannsókn stendur yfir.

Aðstoðarlögreglustjórinn, John Murphy, sagði að hinn grunaði þekkti fórnarlömbin.

„Þetta er afar átakanlegt mál þar sem talið er að móðir og tvö börn hennar hafi verið myrt.“

Hann sagði að rannsóknin væri enn á frumstigi en mjög umfangsmikil.

„Við beitum öllum tiltækum úrræðum til að komast að því nákvæmlega hvað gerðist og finna þann sem ber ábyrgð.“

Samkvæmt Murphy hefur lögreglan þegar borið kennsl á grunaðan einstakling.

„Í ljósi þeirra upplýsinga sem við höfum aflað teljum við að hinn grunaði, sem þekkti öll fórnarlömbin, hafi yfirgefið landið.“

Þrátt fyrir það segir lögreglan ekkert benda til þess að almenningur sé í sérstakri hættu. Lögregluviðvera verði engu að síður aukin á svæðinu til að styðja við rannsóknina og veita íbúum öryggiskennd.