Lögreglan í Los Angeles var kölluð að heimili tónlistarmannsins Chris Brown síðdegis á mánudag eftir að tilkynnt var um meint innbrotstilraun á eign hans í borginni.

Samkvæmt heimildum TMZ barst lögreglu tilkynning um klukkan 17:55 að staðartíma vegna konu sem átti að hafa reynt að komast inn á heimili söngvarans. Um er að ræða glæsihýsi Browns sem metið er á um 3,8 milljónir dala og er með sex svefnherbergjum og tíu baðherbergjum.

Þegar lögregla kom á vettvang var kona handtekin fyrir ólöglega inngöngu á lóðina. Heimildir lögreglu segja að henni hafi þó ekki tekist að komast inn í húsið sjálft.

Atvikið er það nýjasta í röð óþægilegra uppákoma við heimili Brown undanfarna daga. Fyrr í vikunni var maður handtekinn fyrir utan húsið, en sneri aftur að eigninni eftir að honum hafði verið sleppt úr haldi. Hann var í kjölfarið handtekinn í annað og síðan þriðja sinn eftir að hafa aftur komið að heimili söngvarans.

Ekki hefur verið greint frá því hvort Chris Brown hafi verið staddur á heimilinu þegar atvikið átti sér stað.