Lögregla í Englandi rannsakar nú nýjar ásakanir sem beinast að Andrew Mountbatten-Windsor, áður prins Andrew, vegna meints atviks sem á að hafa átt sér stað árið 2002 á hestamótinu Royal Ascot.
Samkvæmt umfjöllun Sunday Times eru rannsóknarlögreglumenn hjá Thames Valley-lögreglunni sagðir kanna meint atvik frá árinu 2002 sem tengist konu á Royal Ascot-hátíðinni. Eru yfirvöld jafnframt sögð skoða möguleg önnur brot, þar á meðal meint kynferðisbrot, spillingu og fjársvik.
Royal Ascot er eitt þekktasta og virtasta veðreiðamót Bretlands og hefur verið haldið um aldir með mikilli viðhöfn. Árið 2002 voru meðal gesta Elísabet Bretadrottning heitin, Karl Bretakonungur, Edward prins og Beatrice prinsessa, dóttir Andrews.
Ekki hefur komið fram hvenær ásakanirnar voru formlega tilkynntar lögreglu, en þetta er í fyrsta sinn sem greint er frá því að rannsókn hafi verið hafin vegna málsins.
Andrew hefur verið undir mikilli smásjá undanfarin ár vegna tengsla sinna við Jeffrey Epstein. Fyrr á þessu ári var greint frá því að hann hefði verið handtekinn vegna gruns um að hafa sent Epstein trúnaðargögn tengd breskum viðskiptamálum árið 2010.
Nafn Andrews kom einnig fyrir í skjölum sem birt voru opinberlega í tengslum við Epstein-málið, ásamt ljósmyndum sem vöktu mikla athygli.
Í kjölfar þeirrar umfjöllunar svipti Karl Bretakonungur Andrew opinberum titlum hans og hann missti jafnframt afnot af Royal Lodge-setrinu í Windsor.
