Lögregluyfirvöld í Pasadena í Kaliforníu rannsaka nú atvik þar sem lögreglumaður særði samstarfsmann sinn með skoti fyrir slysni í bílageymslu lögreglunnar. Atvikið átti sér stað 7. september 2025 en upptökur úr mælaborðsmyndavél voru birtar opinberlega á miðvikudag.

Á myndskeiðinu sést lögreglubifreið aka að tveimur lögreglumönnum sem standa við aðra lögreglubifreið. Annar þeirra bregður skammbyssu sinni á loft og beinir henni í átt að ökumanni bifreiðarinnar sem nálgast, áður en hann setur vopnið aftur í hulstrið.

Samkvæmt upplýsingum frá lögreglunni brást ökumaðurinn við með því að draga fram eigið skotvopn. Við það hljóp skot af byssunni fyrir slysni. Kúlan fór í gegnum framrúðu lögreglubifreiðarinnar og hæfði hinn lögreglumanninn í handlegg.

Sá sem varð fyrir skotinu hlaut meiðsli en hefur náð sér að fullu að sögn lögreglunnar.

Lögreglustjórinn í Pasadena, Gene Harris, fordæmdi atvikið. Hann lagði áherslu á að hegðun af þessu tagi væri með öllu óásættanleg innan lögreglunnar.

Málið er nú til rannsóknar hjá lögreglunni í Pasadena í samstarfi við embætti héraðssaksóknara í Los Angeles-sýslu.