51 árs gamall maður lést eftir að hafa fallið af svölum inni í tónleikahöllinni Madison Square Garden í New York á laugardagskvöld. Atvikið átti sér stað meðan bandaríska rokksveitin Goose hélt þar tónleika.
Samkvæmt upplýsingum frá lögreglunni í New York var brugðist við útkalli klukkan 21:51 að staðartíma eftir að maðurinn fannst meðvitundarlaus og án lífsmarka inni í höllinni. Hann var fluttur á Bellevue-sjúkrahúsið þar sem hann var síðar úrskurðaður látinn.
Lögregla segir manninn hafa fallið af svölum í höllinni. Ekki hefur verið upplýst hversu hátt fallið var. Yfirvöld hafa ekki birt nafn hins látna og málið er ekki rannsakað sem sakamál. Eiginkona mannsins var á vettvangi þegar atvikið átti sér stað.
Tónleikarnir voru hluti af tveggja kvölda tónleikaröð sveitarinnar Goose í Madison Square Garden.
Í yfirlýsingu sem sveitin birti eftir tónleikana segist hún vera „sorgmædd og miður sín“ vegna atviksins.
„Við sendum öllum sem urðu fyrir áhrifum af þessum hörmulega atburði okkar innilegustu samúðarkveðjur. Við þökkum einnig viðbragðsaðilum og starfsfólki tónleikastaðarins fyrir umhyggju þeirra og stuðning,“ sagði í yfirlýsingunni.
Madison Square Garden er einn þekktasti tónleika- og íþróttavettvangur Bandaríkjanna og laðar árlega að sér milljónir gesta. Rannsókn á tildrögum slyssins stendur yfir.
