Þrís létust og sex særðust í umfangsmikilli drónaárás Úkraínumanna á Moskvuhérað, að sögn Andrei Vorobjovs héraðsstjóra.
Einn hinna látnu var tvítugur íbúi þorpsins Radumlja í Solnetsjnogorsk-umdæmi. Íbúar í Ístra og í Volokolamsk- og Domodedovo-umdæmum særðust einnig og liggja þrír þeirra á sjúkrahúsi.
Í Ístra skemmdust tíu einbýlishús í þorpunum Safontyevo, Torlopovo, Gorki og Yadromino. Auk þess urðu skemmdir á útihúsum og tveimur bifreiðum. Í Domodedovo kviknaði í einbýlishúsi í þorpinu Lobanovo og annað hús eyðilagðist í Barybino.
Úkraínsku eftirlitsrásirnar á Telegram, Exilenova Plus og Supernova Plus, auk óháðu fréttarásarinnar Astra, greindu frá því, með vísan til mynda og myndskeiða frá vitnum, að eldur hefði kviknað í olíuflutninga- og dreifistöðinni Volodarskaya í Moskvu-héraði.
Samkvæmt opinberum upplýsingum er stöðin sögð stærsta olíubirgðastöðin í Moskvu-héraði og mikilvægur hlekkur í afhendingu olíuvara til Moskvu og nærliggjandi svæða. Stöðin tilheyrir hlutafélaginu AK Transnefteprodukt. Héraðsyfirvöld hafa ekki greint frá eldsvoðanum.
Vorobyov sagði að loftvarnir og rafhernaðarkerfi hefðu grandað alls 185 úkraínskum drónum yfir Moskvu-héraði.
Sergei Sobyanin, borgarstjóri Moskvu, sagði að 650 drónar hefðu byrjað að stefna að borginni og nágrenni hennar að kvöldi 5. október. Að sögn hans skutu loftvarnir niður stóran hluta þeirra áður en þeir komust nær borginni.
Loftvarnir skutu niður 105 dróna sem stefndu að Moskvu. Sobyanin greindi síðar frá því að 29 úkraínskir drónar til viðbótar hefðu verið skotnir niður á leið sinni að borginni.
Þá urðu árásir Rússa einum að bana og særðu sjö aðra í Úkraínu, en þær beindust að Kharkív og Kherson auk iðnaðar- og hafnarinnviða í Odesa-héraði, að sögn úkraínskra embættismanna í gær.
