Leikarinn og raunveruleikastjarnan Matt Brown, sem þekktur var úr sjónvarpsþáttunum Alaskan Bush People, fannst látinn í ánni Okanogan í Washington-ríki eftir margra daga leit. Þetta kemur fram í tilkynningu frá sýslumannsembættinu í Okanogan-sýslu.

Leitarhópur fann lík Browns á laugardag eftir umfangsmikla leit á svæðinu. Lík hans hefur verið afhent réttarmeinafræðingi sem mun skera úr um dánarorsök og hvort um sjálfsvíg hafi verið að ræða.

Bróðir hans, Bear Brown, staðfesti andlátið fyrr um helgina og sagðist aldrei hafa ímyndað sér að bróðir hans myndi skaða sjálfan sig.

Samkvæmt upplýsingum frá neyðarlínu hafði maður samband og sagði sagt að Brown væri í sjálfsvígshugleiðingum. Þar kom fram að hann hefði skotið sig áður en hann féll í ána og straumurinn borið hann á brott. Bakpoki fannst við árbakkann ásamt tómu byssuhylki og talið var að skotvopnið hefði endað í vatninu.

Leitaraðgerðir voru umfangsmiklar og komu meðal annars að þeim kafarateymi, leitarhundar og sérhæfð sónartæki. Leit var þó tímabundið hætt vegna erfiðra veðurskilyrða og sterks straums í ánni.

Brown hafði um árabil glímt við fíknivanda og steig til hliðar frá þáttunum árið 2019 eftir meðferð. Hann hafði síðan búið í norðausturhluta Washington-ríkis og birt reglulega myndskeið úr daglegu lífi sínu á samfélagsmiðlum.