Um tuttugu manns slösuðust við lúxusverslunarmiðstöð í Ginza-hverfinu í miðborg Tókýó í dag eftir að maður úðaði óþekktu efni inni í byggingunni, samkvæmt upplýsingum frá lögreglu og slökkviliði í Japan.
Talsmaður lögreglunnar í Tókýó sagði að maður hefði úðað efni við hraðbanka á jarðhæð verslunarmiðstöðvarinnar. Slökkviliðsmenn voru kallaðir á vettvang eftir að tilkynningar bárust um sterka lykt í húsinu og staðfestu yfirvöld að um tuttugu manns hefðu orðið fyrir óþægindum eða minni háttar meiðslum.
Vegurinn fyrir framan verslunarmiðstöðina í hinu vinsæla Ginza-hverfi var lokaður um tíma meðan viðbragðsaðilar störfuðu á svæðinu. Fjöldi slökkviliðsbíla og sérútbúinna neyðarsveita mætti á staðinn, meðal annars starfsmenn í hlífðarbúningum vegna mögulegrar hættu af efninu.
Vitni á vettvangi sögðu að fólk hefði fundið fyrir sviða í hálsi og öndunarerfiðleikum. Sjötug kona sem var stödd í verslunarmiðstöðinni sagði í samtali við japanska ríkisútvarpið NHK að háls hennar hefði byrjað að sviða þegar hún nálgaðist hraðbankasvæðið.
„Þegar ég kom á staðinn var allt komið í uppnám og ég hélt fyrst að um lítinn eld hefði verið að ræða,“ sagði konan. „Þegar ég gekk inn í hraðbankahornið varð hálsinn stingandi og dofinn.“
Sjónarvottar sáu sjúkraflutningamenn flytja tvo einstaklinga á börum í sjúkrabíla á meðan aðrir voru fluttir í sérútbúna bíla til skoðunar. Að sögn NHK virðast meiðslin þó flest vera minniháttar.
Lögreglan rannsakar nú hvað efnið var og hvort um ásetning hafi verið að ræða.
Atvikið hefur vakið upp minningar í Japan um mannskætt saríngasárás Aum Shinrikyo-safnaðarins í neðanjarðarlestakerfi Tókýó árið 1995. Þá létust 14 manns og yfir 5.800 veiktust eftir að meðlimir sértrúarsafnaðarins slepptu taugaeitrinu saríni í lestum.
