Minnst 21 lést þegar tvær smárútur og jeppi lentu í hörðum árekstri á þjóðvegi í Western Cape-héraði í Suður-Afríku á sunnudagskvöld.

Slysið varð á veginum milli Leeu-Gamka og Prince Albert, um 380 kílómetra norðaustur af Höfðaborg. Road Traffic Management Corporation, RTMC, sem fer með umferðaröryggismál í landinu, staðfesti á mánudag að 21 hefði látist af völdum áverka sem þeir hlutu í slysinu.

Samkvæmt suðurafrískum fjölmiðlum varð áreksturinn um klukkan 21:30 að staðartíma á sunnudag. Loka þurfti veginum í kjölfarið á meðan viðbragðsaðilar störfuðu á vettvangi.

Lögregla hefur hafið rannsókn á slysinu vegna gruns um manndráp af gáleysi. Þá voru nokkrir aðrir farþegar fluttir á sjúkrahús, en ekki liggja fyrir nánari upplýsingar um líðan þeirra.

Suður-Afríka býr yfir einu þróaðasta vegakerfi Afríku en banaslys í umferðinni eru þar tíð. Hraðakstur, gáleysislegur akstur, óörygg ökutæki og lítil notkun öryggisbelta eru meðal helstu orsaka.

Alls létust 11.485 manns í umferðarslysum í Suður-Afríku árið 2025, rúmlega fimm prósentum færri en árið áður. Flestir hinna látnu voru gangandi vegfarendur.