Að minnsta kosti þrír létust í loftárásum Rússa á Úkraínu í nótt, þar á meðal 22 ára gömul barnshafandi kona, samkvæmt upplýsingum frá úkraínskum stjórnvöldum. Árásirnar voru gerðar aðeins nokkrum klukkustundum eftir að Volodymyr Zelensky Úkraínuforseti átti fund með bandamönnum sínum í London.

Andriy Sybiga, utanríkisráðherra Úkraínu, sagði að konan hefði látist í borginni Chuguiv í Kharkiv-héraði í norðausturhluta landsins. Yfirvöld birtu myndir sem sýna mikla elda í íbúðarhúsum og bifreiðum eftir árásirnar.

Galyna Minaeiva, bæjarstjóri Chuguiv, sagði borgina hafa orðið fyrir árásum með eldflaugum og írönskum Shahed-drónum.

Úkraínsk stjórnvöld saka Rússa um að auka árásir á óbreytta borgara þar sem hernum hafi ekki tekist að ná settum markmiðum sínum á víglínunni. Báðir aðilar hafa á undanförnum mánuðum aukið umfang drónaárása.